ማህበራችን

የቅጂ እና ተዛማጅ መብቶች የሚያስገኙ ስራዎች ያሏቸው ባለመብቶችን ይወክላል፡፡ እነዚህም ሙዚቀኞች፣ አቀናባሪዎች፣ ደራሲያን፣ ሰዓሊዎች፣ ፎቶግራፍ አንሺዎች፣ ተዋንያን ወዘተ ናቸው፡፡

የቅጅና ተዛማጅ መብት የሚያስገኙ ስራዎች ያሏቸው ባለመብቶች የፈጠራ ስራዎቻቸውን በተሻለ ሁኔታ ለማስተዳደርና የሚደርስባቸውን የመብት ጥሰት ለመከላከል በጋራ መስራታቸው ጠቃሚ እንደሆነ ይታመናል፡፡ በመሆኑም አገራችን የቅጅና ተዛማጅ መብቶች ጥበቃ አዋጅ እና በየወቅቱ እያደገ የመጣውን የቅጅና ተዛማጅ መብቶች ጥበቃ እንቅስቃሴ የሚመጥን የህግ ስርዓት ለመዘርጋት እና ባለመብቶች በተደራጀ እና በተጠናከረ አግባብ መብቶቻቸውን ማስተዳደር የሚችሉበትን ሁኔታ ለመፍጠር እንዲቻል በኢትዮጵያ ፌደራላዊ ዲሞክራሲያዊ ሪፖብሊክ ህገ መንግስት አንቀጽ 55/1 መሰረት በቅጅና ተዛማጅ መብቶች ጥበቃ አዋጅ ቁጥር 410/1996 እና በአዋጁ ማሻሻያ 872/2007 መሰረት “የኢትዮጵያ የቅጅና ተዛማጅ መብቶች የጋራ አስተዳደር በ2009 ዓ.ም ተቋቁሟል፡፡ በዚህ አዋጅ አንቀጽ 2(32) በተቀመጠው ትርጉም “የጋራ አስተዳደር ማህበር ማለት የቅጅና ተዛማጅ መብቶች ባለቤቶች መብቶቻቸውን በጋራ ለማስተዳደር የሚያቋቁሙት ማህበር ነው” ይላል፡፡ ስለሆነም በሀገራችን የሚገኙ እና በአምስት ዘርፎች የተሰማሩ በቅጅና ተዛማጅ መብቶች አዋጅ ጥበቃ ሊያገኙ የሚችሉ የፈጠራ ስራ ያሏቸው ባለመብቶች በሰኔ11/2009 ዓ.ም የቅጅና ተዛማጅ መብቶች የጋራ አስተዳደር መስርተዋል፡፡

በሀገራችን በኢትዮጵያ የሚገኙ በሙዚቃ፣ በኦዲዮቪዢዋል ወይም ፊልም፣ በስነጽሑፍ፣ በቲያትርና ድራማ እና በስዕልና ቅርጻ ቅርጽ ዘርፎች የፈጠራ ሥራዎች ያሏቸው ባለመብቶች ከሥራዎቻቸው ተገቢውን የኢኮኖሚና የሞራል ጥቅሞች ለማግኘት በቅጅና ተዛማጅ መብቶች አዋጅ መሰረት ያቋቋሙት የጋራ አስተዳደር ማህበር ነው፡፡ ማህበሩ የአባላት ሥብሥብ በሆነው ጠቅላላ ጉባኤ በተመረጡ አስራ ሶስት የቦርድ አባላት ይመራል፡፡ ቦርዱ ጠቅላላ ጉባኤ በሰጠው ሥልጣንና ሃላፊነት መሰረት ሥራ አስኪያጅ እና ሌሎች አስፈላጊ የሆኑ ሠራተኞችን ይቀጥራል፡፡ ሥራ አስኪያጁ የጋራ አስተዳደሩን አመታዊ እቅድ እና ሌሎች ተግባራትን በበጀት አስደግፎ በማዘጋጀት በቦርዱ ያጸድቃል፡፡